Despues di weganan sumamente interesante di
basketball escolar na nivel di Enseñansa Avansa organisa pa IBiSA riba su
calendario di Deporte Escolar pa aña 2013, ta asina leu cu e final nacional ta
tuma lugar riba diamars dia 10 di december 2013 den Centro Deportivo Libertador
Betico Croes na Sta. Cruz.
E schoolnan cu a clasifica pa hunga e final nacional ta: Maria College, Abraham de Veer School, E.P.B. Pariba y La Salle College. E weganan ta programa pa cuminsa exactamente 3’or p.m. Den e prome wega a midi forsa riba tereno e hobennan di Maria College contra esnan di Abraham de Veer School, pa ganador A, mientras cu e di dos wega di atardi a bay entre E.P.B. Pariba y La Salle College, pa ganador B. E atardi ta continua cu wega number 3, cu lo ta entre e schoolnan perdedor pa clasificacion final di e di tres y di cuater lugar. E ultimo wega di diamars atardi lo ta entre e schoolnan ganador, pues A y B, pa asina defini e Campeon oficial di e competencia di Basketball Escolar 2013 organisa pa IBiSA. E mesun atardi, despues di e weganan lo tuma lugar entrega di medaya y trofeo na e schoolnan ganador. For di awor, IBiSA ta invita tur alumno, docente y mayor di e schoolnan cu a clasifica pa e final nacional di Basketball Escolar 2013, pa bin duna apoyo na e hobennan cu sigur lo brinda tremendo weganan riba cancha di Centro Deportivo Libertador Betico Croes na Sta. Cruz.
