E Curso internacional aki a wordo duna pa e Instructor Internacional di FIVB Sra. Sue Gozansky y como Supervisor di NORCECA tabata presente Sra. Yohana Mota Moreno.

Cu asistencia di FIVB, NORCECA, Regional Development Volleyball Center y Aruba Sportsubisidie Commissie, Aruba Volleyball Association despues di 18 aña a bolbe tene un Curso Internacional pa Coach Nivel 1 na cual 14 persona a participa di cual 12 ta di Aruba, 1 di French St. Martin y un di Brasil.  E Curso tabata tin un duracion di 11 dia y e temanan tabata den e diferente divisionnan di Volleyball manera Mini, Indoor y Beach Volleyball muy especialmente dirigi ariba nos hobennan (U23), hubenilnan (U19/U18/U16 y U15) y muchanan bao 13 aña (U13).  E cursistanan a haya tambe presentacionnan cu temanan specifico ariba volleyball di parti Referee Sr. Octavio Woodley y Fysio Therapista Sr. Frank Velazquez.  Na final tur participante mester a pasa un Examen (Teoria y Practico) pa proba cu resultadonan positivo cu nan a bira un Coach Internacional Certifica pa FIVB.

Sra. Filomena Daniel – Curiel, Presidente di Aruba Volleyball Association a felicita tur e participantennan y a expresa palabranan di gratitud na tur e instancianan cu a haci posibel cu e Curso aki por a tuma lugar na Aruba.  Tambe Sra. Daniel Curiel a dirigi su mes na e Cuerpo di Coach presente pa mantene e lazo di comunicacion y teamwork y cu hunto traha na bienestar y progreso di nos atletanan hoben y di volleyball en general. 

Sra. Sue Gozansky y Sra. Yohana Mota Moreno tambe a expresa nan palabranan di felicitacion na e Coachnan y a pidi nan pa pone tur locual cu nan a siña den practica cu e hobennan y sigi desaroya nan conocimento den coaching pa mañan nan tambe por bira un Instructor di Volleyball di FIVB.

E Dirigente/Atletanan cu a logra nan diploma di International Coach Level 1 ta: Elmerlindo Robles de Medina, Julisa Jones, Leonard Hilman, Jarryd Ruiz, Julian Jones, Errol Yrausquin, John van der Lee, Vercellio Statie, Deborah Alleyne, Frederik Paesch, Richard Werleman, Ludwina Perez, Gilson Alves Bernardo di Brasil y Jeff Pierre di French St. Martin.  Masha Pabien na e tur e Coachnan.