Recientemente Aruba Bank a yama un conferencia di prensa pa informa ariba e celebracion di e di 10 aniversario di e Youth National Ranking Tennis Tournament cual Aruba Bank ta fungi como main sponsor.

Durante e conferencia aki cu a tuma lugar na Eagle Sports Club, Sr. Eddie Ras, director di e evento aki y kende tin un trayectoria di 35 aña den e deporte aki, a hiba palabra primeramente pa gradici Aruba Bank pa nan confiansa durante e 10 añanan aki, caminda hobennan atleta di tennis, a mira den e evento aki un tremendo oportunidad di adquiri experiencia hungando contra tennistanan di nan promedio di edad.

Sr. Ras a relata cu 10 aña pasa, e evento aki a conoce un participacion di 40 mucha, sin embargo segun cu e añanan a pasa, e participacion a keda aumenta den cada evento.  Hopi di e muchanan cu tempo ey nan a cuminsa participa den e evento aki, awendia ta hobennan cu a representa Aruba den exterior y varios di nan hasta a logra di haya scholarship debi na nan deporte di Tennis.

E categorianan cu lo bai ta participando den e evento aki ta 10&U, 12&U, 14&U y 18&U, tambe a wordo hinca un categoria cual ta 16&U cu aña benidero e ora nan lo por hunga den e categoria 18&U.

Tambe a hiba palabra Laura Tromp, Representante di e Marketing Department di Aruba Bank, kende a expresa cu Aruba Bank ta sinti masha orguyoso di por ta e main sponsor di e evento aki y a la vez nan ta invita tur mucha cu ta practica e deporte aki di Tennis, pa participa den e evento aki y adkiri mas experiencia mas desaroyo den e deporte aki.

E evento aki lo bai tuma lugar ariba e fechanan Diabierna 24, Diasabra 25 y Diadomingo 26 di October proximo y por pasa inscribi caba pa participa na e evento aki na Eagle Sports Club (Eagle Tennis Club), tur mucha participante lo haya un T-shirt conmemorativo di e 10 aniversario di e evento aki.

Tambe Aruba Bank kier a encurasha tur mucha entre 4 y 8 aña pa inscribi pa participa den un categoria cu a wordo yama “Mini”, cual lo bai tuma lugar ariba dia 1 di November.