E torneo lo cuminsa diahuebs 23 di October, lo sigui diabierna y diasabra 24 y 25 di October y lo termina diadomingo 26 di October.  E apertura oficial lo tuma lugar diabierna, 24 di October den oranan di atardi na Eagle International Tennis Club. 

E torneo aki ta uno cu anualmente ta tuma lugar y ta parti den diferente categoria U10, U12, U14 y U18, tanto mucha muher y mucha homber y ta completamente bao auspicio di Aruba Tennis Bond.

E ta un torneo nacional y e interes ta hopi grandi, ya cu practicamente bo ta haya tur e muchanan ta participa, tanto esunnan cu ta den e fase di comienso, intermedio, como esunnan cu ya ta den un fase mas avansa.

Lo tin un categoria specialmente pa e mas chikitonan cu nan ta yama categoria Mini y ta dividi den e edadnan di: 4-6 y 6-8.

Tin mas cu 150 mucha cu lo participa na e torneo aki, ya cu tur clubnan di tennis a registra.

Aruba Bank conhuntamente cu Eagle International Club ta invita un y tur pa bin presencia e tremendo torneo di tennis y a la ves apoya nos muchanan, pa nan disciplina, dedicacion y esfuerso den nan deporte.