Den fin di siman tras di lomba, nos dushi isla di Aruba tabata pais anfitrion di e gran torneo internacional di biyar 9 Ball Open ABC entre e islannan di Corsow, Boneiro y Aruba.

Durante tres dia largo, un total di 29 hungado di biyar a hiba un bataya fuerte pa asina haya sa kende ta e miho hungado di biyar entre e tres islanan.

  E cas di biyar na Aruba esta Classic Billiards a host tur e weganan cu a conta cu e mihor hungadonan di biyar di tur e tres islanan.  Mester bisa cu nos hungadonan local a sa na domina mayoria di e campeonato unda cu e Gunnar Leonardo a titula su mes como e campeon di ABC.

  Den un wega di final dramatico, e atleta Leonardo a gana un otro gran hungador local esta Ryan Rampersaud cu e score final di 9 – 7 pa asina logra e titulo entre e mihor hungadornan di Aruba, Corsow y Boneiro, mientras Rampersaud a keda na di dos lugar.  Notabel ta cu tur e otro atletanan di biyar di Aruba tambe a haci bon papel durante di e torneo internacional di biyar, manera Jason Kock kende a keda na di tres lugar.

  Un danki sigur na Lotto, e Loteria di Aruba pa medio di Comision di Subsidio kendenan tambe a yuda subsidia e campeonato internacional di biyar 9 Ball Open ABC.