Despues di e partido di diadomingo 24 di mei 2015, e club sv Britannia a entrega un protest contra di sv RCA, pa motibo cu segun sv Britannia, RCA a hunga e wega aki cu un hugado cu no tawata tin e derecho di hunga dicho partido. Manera ta conoci cu sv RCA a gana e partido aki cu anotacion di 2-0 contra di sv Britannia. 

Segun e ponencia di sv Britannia cu sv RCA lo a haci uso di un hungado cu no tawata tin derecho di participa na dicho partido. Di otro banda sv RCA tambe a entrega un protesta contra di sv Britannia, pasobra segun sv RCA cu sv Britannia tambe lo a haci uso di un hungado cu no tawata tin derecho di participa na e mesun partido aki. 

Pues ambos equipo a protesta riba un asina yama “niet gerechtigde speler” cu a participa na momento cu sv Britannia a enfrenta sv RCA e diadomingo 24 di mei.

Esaki segun articulo 56 inciso 3 b di e Huishoudelijke reglementen di AVB. Hunto cu dicho articulo, ambos club tambe a basa nan protesta riba articulo 57 inciso 1 bou (a) cual tin di haber cu entre otro, documentonan di transferencia y pagonan cu ta mara na esaki, esta di un club na e otro club, como tambe na AVB.

Den cuadro cu tin dos protesta di ambos equipo cu a drenta na oficina di AVB, directiva di AVB a reuni, pa trata esaki nan.

Diaranzon dia 27 di mei 2015, e directiva di AVB despues di a analysa y discuti ambos protesta, a yega na un decision final, cual decision ta cu;

Den e protesta di sv Britannia contra di sv RCA, kende ta di opinion cu sv RCA a haci uso di un hungado cu segun sv Britannia no tawata tin e derecho di participa durante e partido contra di sv Britannia, AVB ta dicidi cu sv Britannia no ta haya rason den nan protesta.

Pa loke ta trata e protesta di sv RCA contra di sv Britannia, kende ta di opinion cu sv Britannia a haci uso di un hungado durante e partido disputa entre e dos clubnan aki, cu segun sv RCA no tawata tin derecho di a hunga e partido contra di nan, aki directiva di AVB ta duna sv RCA rason riba nan protesta y ta considera e hunagdo di sv Britannia illegal durante e partido entre sv Britannia contra di sv RCA.

Awor cu e decision final a wordo tuma pa cu ambos protesta, sv Britannia ta keda cu e derecho di bay Beroep pa cu e decision cu AVB a tuma y pa cu esaki e tin te cu 4 dia di trabou, pa haci esaki. Si sv Britannia haci uso di su derecho, esaki lo nifica cu comision di Beroep lo bay analysa e caso pa wak si directiva di AVB a tuma e desicion conforme reglamento. Pa loke ta trata un fecha pa cuminsa e cu e ronda final, esaki lo keda posponi te ora cu e seleccion di Aruba termina cu su compromiso, cual partidonan lo wordo hunga dia 10 di juni na Aruba contra di Barbados y depues e seleccion lo biaha pa Barbados pa eynan hunga nan segundo partido pa clasificacion pa mundial contra di Barbados, cual partido lo tuma lugar dia 14 di juni 2015.