Bayendo bek un poco den historia nos por recorda cu na 2012 durante Champ of the Champs un torneo internacional di halto nivel organisa pa un miembro di ASB esta SV Royal Power cual a wordo auspicia pa ASB a cuminsa habri e portanan internacional pa nos atletanan.  Asina e tempo aya un equipo Hulandes cu a bin Aruba pa competi den Champ of the Champs cual tabata consisti di hungadornan y scoutnan di seleccion di Hulanda entre otro Glennsig Polonius a scout Eldrick Dijkhoff pa forma parti di seleccion di Hulanda pa e Campeonato Mundial di Softball cual a tuma lugar na Maart 2013 na New Zeeland.   

  Campeonatonan Mundial di Softball ta cada 2 aña unda e 16 mihor paisnan cu clasifica lo enfrenta otro den e evento di mas halto y competitivo cu e deporte di softball conose.  Paisnan fuerte cu mihor pitchernan di mundo lo bataya contra otro manera Australia, New Zeeland, USA, Canada, Venezuela, Argentina pa nombra algun.   Federacion di Hulanda esta KNBSB a aserca Aruba Softball Bond desde Januari e aña aki cu nan ta interesa pa reforsa seleccion di Hulanda cu 2 atleta di Aruba pa e proximo campeonato mundial cual lo tuma lugar di 26 di Juni pa 5 di Juli 2015 na Saskatoon, Canada.  Despues di intercambio di documentonan oficial ASB a bay over na “release” tanto Eldrick Dijkhoff y Angelo Arnold pa seleccion di Hulanda.  Ambos atleta ta constantemente den preparacion hopi fuerte y lo ta saliendo 20 di Juni proximo pa Canada pa asina incorpora nan mes den seleccion di Hulanda.  Esaki sigur ta un soño di cualkier atleta pa hunga contra e mihornan di mundo.

  Separa di e dos atletanan di Aruba tin 2 Arubiano mas biba na Hulanda cu tambe a cay den seleccion y Aruba mester ta contento di su talentonan.  Revin Brooks y Jerome Wouters ta dos talento mas biba na Hulanda cu ta den seleccion Hulandes. ASB mester gradisi tambe dos companianan local kendenan ta coopera pa nos atletanan por haya nan dianan liber di trabao pa por representa Hulanda den e ocasion aki den un evento mundial.  Ambos atleta ta militando den e equipo Royal Power na Aruba kendenan lo mira nan ultimo accion den campeonato regular Diabierna awor 19 di Juni pa 9 p.m riba veld di Kudawecha promer cu nan biaha pa Canada.  Muy probablemente Angelo Arnold lo mira acion riba monticulo como parti di su preparacion tambe pa un mundial.  Aruba mester ta orguyoso di su atletanan y ta desea tanto Eldrick Dijkhoff, Angelo Arnold, Jerome Wouters y Revin Brooks pero alaves henter e selecion di Hulanda hopi exito.  ASB lo manda mas despues e website unda pueblo por sigui e weganan aki.  Pabien Aruba y exito na seleccion di Hulanda.