Dialuna ultimo, COA a tene su Asamblea General riba e relato di aña 2014 den e ballroom di Hollyday Inn Hotel.  Durante e asamblea directiva di e asociacion a ricibi aprobacion di parti di su miembronan pa e rumbo cu ta hibando e organisacion y deporte na Aruba.  E asamblea ademas tradicionalmente ta un excelente ocasion pa intercambia informacion entre COA y su miembronan.  Un total di 18 federacion deportivo a haci acto di presencia na dicho asamblea.  Den su calidad como presidente di COA Sr. Edwin Roos a habri e reunion yamando tur presente un cordial bon bini.
  Prome Sr. Ramphis Tromp di e compania Ernst and Young a repasa e relato financiero di aña 2014.  Despues cu sala a aproba e relato financiero di 2014, Sr. Tromp di Ernst and Young a entrega esaki oficialmente na e tesorero di COA, Sr. Jairzinho Tromp.  Pa cu esaki a firma e acto cual ta un proceso nobo introduci pa prome biaha door di Comite Olimpico Arubano.
  Secretario General di COA, Sra. Nicole Hoevertsz a repasa e actividadnan cu a tuma lugar den e aña 2014, esakinan organisacion interno di COA, participacion na congresonan y reunionnan internacional, proyecto y actividadnan local, Olympic Solidarity y Weganan Deportivo.
  Loke por a conclui ta cu e prestacion di nos atletanan na e Weganan Suramericano conoci tambe como ODESUR pero principalmente na e Weganan Centro Americano y Del Caribe tabata grandioso unda nos a logra obtene 4 medaya un di 11 lugar overall.  Aki Aruba a laga varios pais grandi su tras den e clasificacion general.  Na final e resumen di e actividadnan di aña 2014 a wordo aproba pa henter e sala cu un aplauso fuerte. 
  Un tema sigur interesante tabata e Regeling Sportnationaliteit Koninkrijk der Nederlanden.  E areglo aki ta describi con e dos comitenan olimpico nacional cu actualmente ta existi den Reino Hulandes (NOC*NSF y COA) lo anda cu e hecho cu atletanan cu tin e mesun nacionalidad formal (esta, e nacionalidad di Reino Hulandes) ta scoge un nacionalidad deportivo pa por competi den Weganan deportivo internacional.  Despues di un splicacion amplio di e areglo aki, tabata tin e oportunidad pa haci pregunta y remarca.  Teniendo cuenta cu esakinan, na final asamblea a duna aprobacion en principio na e reglamento nacionalidad deportivo pa Reino Hulandes, habriendo caminda pa e deliberacionnan continua.

  E deporte na Aruba ta pasando den un desaroyo sumamente positivo actualmente. Pa cu esaki, Comite Olimpico Arubano y tur su 24 federacionnan miembro tin tur intencion di sigui traha duro y cu dedicacion, pa asina deporte logra mehora mucho mas ainda.