Encuentronan deportivo ta continua pa loke ta trata ‘Festival di Deporte 2013’ organisa pa Instituto Biba Saludabel y Activo, IBiSA. Weganan di basketball ta den full swing, yen di emocion riba cancha di YMCA na San Nicolaas. For di dos poule un total di 6 school ta participando

Den e di dos wega a midi forza e hobennan di John Wesley College y esnan di EPB-Hato. Agilidad, rapidez y bon dominio riba cancha a duna como resultado final di 23 pa 21. Un score basta preta pero e ganador ta resulta e ekipo di John Wesley College.

E ultimo wega a bay entre e hobennan di Colegio San Nicolaas cu a bataya contra esnan di John Wesley College. Aki ta unda a mira accion y bon hugada. Den un wega emocionante sigur, cu e deseo di gana di ambos banda a resulta den un tremendo wega. Na final e wega ta keda gana pa e ekipo di Colegio San Nicolaas cu anotacion di 46 punto contra 36 di e ekipo di John Wesley College.

Weganan di basketball ta continua e siman aki riba canch di YMCA na San Nicolaas pa mira cua ta e school cu ta titula campeon den basketball den e ‘Festival di Deporte’ 2013 organisa pa IBiSA. E invitacion ta keda na e schoolnan, alumno, docente y mayor pero tambe tur fanatico di bon wega di basketball pa bin mira nos hobennan den accion y mas cu claro duna nan e apoyo cu nan ta merece.