Como atleta, Reginald a representa Aruba den varios competencia di atletismo den exterior manera Dutch Caribbean Age Group como tambe Carifta Games. Awor e atleta Reginald Koc a haya e  oportunidad unico di su bida ora ela wordo selecta pa forma parti di e delegacion di Aruba cu lo competi den e Weganan Olimpico Hubenil cu lo tuma lugar den luna di augustus na Nanjing, China. Pa e motibo aki nos realisa un entrevista cu e atleta Reginald Koc unda nos a puntre con ta bayendo na cu su preparacion pa cu e Weganan Olimpico Hubenil di Nanjing, China.

Según e atleta Koc, prome e tabata practica e deporte di baseball y riba conseho di un bisiña cu tabata practica e deporte atletismo ela dicidi un dia di purba e deporte pa asina e mehora e parti di coremento duro. Ela keda encanta cu e deporte unda esnan rond di dje a ripara cu e tin un talento den esaki y cu su apenas seis aña di edad. Tempo cu Reginald a inicia cu atletismo e tabata haci e meerkamp cual ta un exigencia di Age Group y después a sali afor su specialidad a bira sprint, specificamente e 100m plano.

Mester bisa cu e atleta Koc for di luna di januari a cuminsa prepara pa e Weganan Olimpico Hubenil di Nanjing y ta entrena 6 dia pa siman cu diadomingo liber, e ta entrena 1 ora y mei cada biaha diferente skills pa cu sprint y tambe ta haci “powertraining” den gym. Reginald ta sinti hopi bon unda después di algún aña cu e ta entrena e deporte di atletismo ya caba ela haya e oportunidad di representa Aruba den Weganan Olimpico, e biaha aki e weganan hubenil, cual semper tabata un soño. Actualmente Reginald su mihor tempo riba e 100m sprint ta 10.43 seconde.

Como atleta hoben Reginald tambe ta un rolmodel pa hopi otro hoben y e ta conciente di esey tambe. E ta conseha otro hobennan cu kier haci deporte pa kere den bo mes, sigui cu bo soño, no laga ningún hende stroba bo yega na esaki. Representa Aruba den e Weganan Olimpico Hubenil ta algo grandi pa e atleta Reginald Koc, e ta sinti’e orguyoso di por competi pa Aruba y tambe pa su deporte esta atletismo. Manera ela bisa, e lo haci su máximo esfuerzo pa logra un mihor resultado posibel.