Diaranson 29 di oktober lo ranca sali un campeonato Internacional di billiard na hermana isla Curacao, un evento di bola 10 na un nivel basta halto entre grandinan di Sur America, Centro America, Caribe y Europa.

Presente na e ocacion aki ta Chile, Venezuela, Mexico, Inglatera, Belgica, Hulanda, Jamaica, Trinidad & Tobago, St Lucia, Aruba, Bonaire y Curacao.   

Acosta cu ta bon conoci den region pa su logronan Panamericano, ta hibando un bon preparashon pa por bataya den e grandinan.  E bolsa total di Curacao 10ball Classic ta di Usd $ 25,000.00.

Tambe den mesun sede "Rio Lounge & Sports Bar" cuminsando diahuebs 30 di oktober ta e decimo edishon di King of the Caribbean.    

E torneo di ekipo bola-8 cu a start na 2005 ta esun mas popular den region. Acosta lo lidera su ekipo Predators by Pizza Hut cu a logra 6 final den e 9 edicionnan y a conquista cuatro titulo campeonil, como ekipo mas exitoso di King of the Caribbean.

E aña aki ekipo ta forma pa diferente soldatnan hubenil manera Jorshua Ras, Alex Figaroa, Stephan Acosta, Oscar Talavera, Armand Ridderstap y esnan di mas experencia manera Colin de Nobrega, Mitchell Kelly, George de Nobrega, Edwin Chirino y reforsa pa e legendario Richard Wolff kende tambe lo representa Aruba na Curacao 10ball Classic.

Ditto Acosta ta gradeci gerencia di e prestigioso empresanan aki cu ta super activo den Mundo di Billiard.  Arubianonan cu ta residencia of ta di bishita na Curacao ta mas cu bon bini pa apoya nos hungadornan local.  Por sigi e eventonan tambe en vivo via Facebook y Live Streaming info na Fan Page "King of the Caribbean".