|
Gazelles a retene su titulo di campeon den damas A-clas volleyball |
|
|
|
|
Friday, 06 December 2013 |
 Diaranson anochi den un sala basta anima,
Gazelles a demonstra su derecho di por yama su mes Campeon Maximo den
volleyball damas di Aruba.
Di prome set caba e damanan di S.V.Amstel a luci alegre, decidido y cu bon movecion. Consecuentemente nan a gana prome y di dos set cu e mesun score 25-22; 25-22. Di tres set YMCA a logra gana 25-20. Den di cuater set tambe YMCA a subi mesora na 10-6, pero Gazelles a sa di kibra e creda di YMCA pa e wega no empata. Poco poco ma sigur nan a subi nan score y na 17 empata, Gazelles a tuma rienda y a laga YMCA atras pa gana e set cu score di 25-22. Y asina nan a bolbe titular Campeon den damas A-Clas. Bon mereci! Jackie tabata e curason di e team, bon guia, bon control riba e wega, bon smash, bon service , bon apoyo pa su hungadornan. Outstanding, Jackie. Cathy tambe tabata sa di pone su smashnan na ora bon den tereno di contricante. Gazelles a hunga un wega concentra, nan tabata sa di pusha nan puntonan , sigur di nan hugadanan, confiansa den otro y hungando manera un team. Pabien y sperando di mira Gazelles atrobe y pa hopi anja mas den campeonato di volleyball.
Pabien tambe na YMCA cu a logra atrobe e titulo di sub-campeon. Nos a nota YMCA un poco lento compara cu otro anjanan. Pero nan a duna bon bataya.
Den e wega mas trempan Albo a gana di Unistars y asina a logra keda den Cabeyeros A-clas. E scorenan tabata 20-25; 25-19; 25-15; 25-23. Unistars sigur lo bini bek den B-clas y lo ta mas duro. Ta un team hoben, cu ya a demonstra su potencia.
|
