Diamars dia 21 di januari 2014 a tuma lugar den gymzaal di Prinses Christina School e weganan di volleyball pa sector San Nicolaas. Schoolnan cu a participa y a hunga nan weganan tabata, Commandeur Pieter Boer School, Colegio Sagrado Curason y Sint Paulus School. E prome wega tabata entre Commandeur Pieter Boer School y Colegio Sagrado Curason. Den un wega emocionante di ambos banda y cu cada punto bon bringa te na ultimo, e school ganador a resulta Commandeur Pieter Boer School. Den dos set cu scorenan di 25-10 y 25-27, pa un total di 50 punto, Commandeur Pieter Boer School ta clasifica na prome lugar lagando e di dos lugar pa Colegio Sagrado Curason cu ta finalisa cu 27 punto. Di otro banda, for di trempan Sint Paulus School ta yama y cancela su participacion y esaki automaticamente ta haci cu el a ked’afo di e competencia escolar pa sector San Nicolaas. IBiSA ta felicita e schoolnan cu a participa pa sector San Nicolaas y a clasifica, sperando awor clasificacion di otro sectornan pa e competencia final di volleyball nacional. E school ganador den volleyball escolar Enseñansa Basico mucha muher y mucha homber, ta haya e honor pa representa Aruba den e competencia ‘Interinsular 2014’ cu e aña aki ta tuma lugar na isla di Boneiro dianan 21, 22 y 23 di maart proximo.