Despues di a cai venci den nan prome encuentro contra Uruguay, e duo local mester a enfrenta e defensornan di e medaya di oro den e weganan aki cu ta Venezuela 1. Mester bisa cu e wega aki tabata mas dificil na esun anterior, un duo hopi experiencia, defensornan di e titulo Suramericano y cu a competi na e Weganan Olimpico di Londres 2012. Mester bisa cu nos muchanan a cuminsa den tremendo forma unda dado momento nan tabata hasta dilanti den e marcador 6 - 5, pero despues di esey Venezuela a cuminsa piki punto pero asina mes Aruba no a laga bai te na 15 - 13 na fabor di e venezolanonan. Mester bisa cu e oponente ta anota oportuno, algo cu sigur tabata falta den e team di Aruba. E prome set a bai 21 - 15 pa Venezuela. Den e segundo set, Aruba a bolbe cuminsa agresivo unda bai dilanti 6 - 5, pero despues algun fayo chikito a pone Venezuela bolter e score y asina avansa cu algun punto. E hungadornan De Cuba y Daniel a purba tur cu tin pa stroba e atake di e venezolanonan, pero no ta logra unda a bin cai venci cu e score final di 21 - 15. Asina mes team Aruba a duna mucho mas miho bataya cu den nan prome encuentro. E venezolanonan a elogia e wega di Aruba, mescos ta conta pa e coach y hungadornan di Uruguay kende ya caba kier haci algun contacto cu e delegacion di beach volleyball di Aruba. Nos ta kere cu mester sigui duna sosten y apoya na e dos atletanan ya cu ambos ta purba engrandese e deporte. Aruba tin hopi di ofrece den e deporte di beach volleyball, lugar pa entrena no ta problema. Nos ta spera cu lo tin mas persona interesa pa cuminsa na practica e deporte aki y dentro di algun aña nan tambe por yega leu y representa Aruba den exterior. Mañan e duo di De Cuba y Daniel lo tin nan ultimo encuentro ora nan enfrenta Venezuela 2.