E Federacion di tennis, Aruba Lawn Tennis Bond (ALTB) a manda dos team di tennis ariba 20 di februari 2014 pa Republica Dominicana pa competiti den e prestigioso torneo di tenis “Junior Davis Cup/Junior Fed Cup” (JDC/JFC).  

E JDC/JFC ta un torneo di tennis pa tenistanan den e categoría di 16 aña di edad.  Pa cu e JDC, e team di mucha homber a consisti di Patrick Sydow, Kyle Frankel, Kevin Yarzagaray y como coach Sr. Franz Sydow.  Mientras cu e team di mucha muher pa cu e JFC a consisti di Ashley Poulina, Amarillys Lee, Gina van der Veen y Sr. Henk Bouwman como nan coach.  Den e ronda di qualification ambos team di Aruba a sa di pasa pa maindraw (MD), esta e cuadro principal.  Den e quarter finals di e JFC e mucha muhernan bataya contra Republica Dominicana, caminda Republica Dominicana a sa di a gana, pero Aruba a sa di a demostra di tin un bon nivel di wega.   

  E mucha muhernan a keda na di 7 lugar di e 12 paisnan cu a competi den e JFC.

Pa cu e JDC, e team di mucha hombernan a bataya contra Bahamas den e quarter-finals, caminda Aruba a gana 2-0 y asina pasa pa semi-finals.  Den semi-finals Aruba a hunga contra di Puerto Rico, unda Puerto Rico a pasa pa finals ganando Aruba cu un score di 2-1, cual wega no tabata facil pa Puero Rico.  Aruba a enfrenta Republica Dominicana pa e di tercer puesto, caminda Aruba a sa di demostra un mihor nivel di wega, ganando cu un score di 2-0 y asina posicionando nan mes na di 3er lugar den JDC.  ALTB kier a yama un pabien na e tenistanan, e coachnan y país Aruba pa cu e logro aki.