Oranjestad – E dianan 13, 14 y 15 di juni lo ta dianan sumamente importante pa 775 alumnonan di scol kende ta depende riba e donacion di “Fundacion Ban Uni un Man pa Cria nos Muchanan” pa asina provee nan cu nan desayuno di tur mainta escolar.

Fundacion Ban Uni un Man pa Cria nos Muchanan a wordo estableci na anja 2001 despues cu e Departamento di Facultad di Dr. Horacio Oduber Hospital (HOH) a tuma nota di e cantidad grandi di muchanan cu ta bay scol tur mainta sin desayuno pa motibo di e situacion financiero na cas.
Durante e anjanan y cu sosten di sponsor y communidad completo e Fundacion a crece unda cu te awor 775 alumno ta ricibi un sandwich y un juice of lechi tur mainta prome cu scol.
Apesar di e cantidad impressivo di alumnonan cu ta ricibi nan desayuno tur mainta ainda tin un cantidad grandi di muchanan pa cual fondo no ta yega pa ricibi nan desayuno.
Mirando esaki Tennis School Aruba Palm Beach a dicidi di uni na e Fundacion y dedica e sigiente torneo di tennis hubenil pa recauda fondo y haci un diferencia den e bida di muchanan kende na e momentonan aki ta pasando den dificultad pa motibo di situacion financiero na cas y como tambe pa trese concientisacion riba e problematica aki cual ta uno cu hopi no sa di dje na aruba.
E torneo di tennis lo tuma lugar na The Mill Resort riba dia 13, 14 y 15 di juni unda cu tur fondo recauda lo wordo entrega na Fundacion Ban Uni un Man pa Cria nos Muchanan.
Tennis School Aruba Palm Beach ta haci un invitacion na pueblo completo y tur alumno di tennis pa registra na e torneo aki y asina brinda sosten y contribui na e gran fundacion aki cu ta alimenta muchanan di scol tur mainta cual ta essencial pa nan crecemente personal y salud.
Registracion ta costa 15 florin y por wordo haci na 5925540.