Den e torneo aki a bin ekipo y hungadonan di Spaña, Venezuela, Merca, Brazil y naturalmente nos isla Aruba a wordo representa.

Aki a hunga na un nivel basta halto caminda e ganadonan lo ricibi punto pa ranking mundial.  Por bisa cu esunnan di Aruba sigur tabata tin un par di luna ta train bastante duro pa e evento aki.

Despues cu a hunga e prome rondnan, quarter y tambe semi finals na Tropicana, diadomingo a tuma lugar e final na Nikki Beach caminda a set up un cancha cu e rekisitonan mundial.  Por a mira representantenan di ITF Federation durante e evento cual ta bisa cu tabata un nivel serio y segun reglanan internacional di Beach Tennis.

Den e seccion femenino “consolation draw”, e ekipo di Aruba representa door di Barbara Nieuwmeyer y Marritt Fleur a sali victorioso.

Den e main draw, cual ta e nivel caminda e hungadonan ta gana punto pa e ranking mundial, un team di Aruba a bolbe sali victorioso kende nan tabata Maria Buuts y Betza Rasmijn.  Ta bon pa remarca cu e 2 hungadonan aki ta den preparacion extensivo pa bay representa Aruba den e wega Panamericano di Beach Tennis na Santos, Brazil.

Den e seccion masculino den e “consolation draw” Aruba atrobe a sali victorioso cu e ekipo forma pa Edward Dubero y Joal Maduro kende nan a bataya fuerte despues di a perde e prome set pero a sa di bin bek y bay cu e victoria.  E main draw masculino a wordo gana pa un ekipo fuerte di Venezuela, esta e rumannan Jorge y Pedro Peñalvar di Venezuela, dos persona conoci caba na Aruba cu ta yudando varios hungador di Aruba cu extra training pa miho preparacion den e deporte aki.

Beach Tennis ta birando un deporte mas y mas grandi mundialmente y tambe na Aruba ta nota esaki y ta spera pa mira mas di nos muchanan y hobennan yega na Tropicana y purba e deporte dushi aki!