Aruba Lawn Tennis Bond (ALTB) conhuntamente cu Guardian Group, Fatum, ta organisa ariba e weekend di 14 y 19 - 21 di September 2014, e promer Guardian Group, Fatum, Youth Ranking Tournament.

Esaki ta un tennis ranking tournament caminda e tenista ta acumula punto pa cu su ranking nacional.

Ariba e weekend aki e categoria nan cu ta compitiendo lo ta esnan di 10 y 14 aña di edad.  Den e siguiente weekend di 19 pa 21 di september 2014 e categorianan cu lo ta compitiendo ta esnan di 12 y 18 aña di edad.  E parti e torneo ariba dos weekend ta duna e tenista e oportunidad di competi den dos categoria.

E torneo lo tuma lugar na Aruba Racquet Club (ARC) y lo inicia durante e dianan di diasabra y diadomingo for di 8:30 di mainta.  E gran final di tur dos weekend ta wordo hunga ariba diadomingo.

Directiva di ALTB kier agredeci Guardian Group, Fatum, pa patrocina e ranking tournament aki y tambe ta desea tur tenista tur clase di exito.  Tambe kier a invita tur fantatico di tennis pa pasa ARC y apoya nos talentonan local y tambe lo duna información pa esnan cu ta desea di inicia cu e deporte di Tennis.

Ariba e imagennan por aprecia e momento cu tabata tumando lugar un conferencia di prensa na Aruba Racquet Club pa anuncia e evento aki.  Den e panel a hiba palabra Sr. Javier Weffer, Sr. Henk Bouwman y Sra. Madeline Jacopucci representante di Guardian Group.